దేవతల్లో నాలుగు చేతులు, ఎనిమిది చేతులు, పద్దెనిమిది చేతులు, పదిచేతులు ఇలా ఎందుకుంటాయి? అన్ని చేతులున్న వాళ్ళెక్కడైనా ఉంటారా?

మనకి కనిపించే మనలాంటి జంతువులతో దేవతల్ని పోల్చుకోనక్కర్లేదు. మనవలె ఉండని వారే దేవతలు. వారి బహుశక్తి సంపన్నతకు సంకేతాలు బహుబాహువులు. నాలుగు దిశలలో విస్తరించిన విశ్వ చైతన్య శక్తి (Cosmic energy) దైవం. ఆ దిశలని ఎనిమిదిగా (మూలలతో - విదిశలతో కలిపి) చూస్తే - అష్టదిశలా ఆవరించిన అష్టభుజాలు. పరిపూర్ణ సంఖ్యకు (1+8=9) సంకేతంగా పూర్ణశక్తి సంకేతం అష్టాదశ భుజాలు. ఇవీ దేవతల చేతులకి సంకేతాలు. ఇంతేకాక - మనకు తెలియని రహస్యాలు చాలా ఉంటాయి. జంతు ప్రపంచంలోనే మనకంతుపట్టని దేహ స్వభావాలున్నవి అసంఖ్యాకం. మరి దేవతా జగతి గురించి మన బుద్ధులతో అంచనా వేయగలమా!
పై సంకేతాలే కాక - ఆయా దేవతలకి సంబంధించిన శబ్ద స్వరూపమైన మంత్రాలలోని బీజాక్షరాలు, మంత్రాక్షర నిర్మాణం కూడా దేవతకృతిలో గర్భితమై ఉంటుంది. ఆయా మంత్రాలను శ్రద్ధగా ఉపాసిస్తున్న కొద్దీ ఆ దేవత అనుగ్రహిస్తుంది. ఆ అనుగ్రహంతో దేవతా తత్త్వం అవగతమవుతుంది.