శ్రీమద్భగవద్గీత...సాంఖ్యయోగం 02--02 & 03

శ్రీమద్భగవద్గీత...సాంఖ్యయోగం 02--02 & 03
---------------------------------
శ్రీ భగవానువాచ:

కుతస్త్వాకశ్మలమిదం విషమే సముపస్థితమ్ |
అనార్యజుష్టమస్వర్గ్యమకీర్తికరమర్జున ||

క్లైబ్యం మా స్మ గమః పార్థ నైతత్త్వయ్యుపపద్యతే |
క్షుద్రం హృదయదౌర్బల్యం త్యక్త్వోత్తిష్ఠ పరంతప ||
......
అర్జునా! ఈ సంక్లిష్ట సమయంలో ఆర్యధర్మ విరుద్ధమూ,
అపకీర్తి దాయకమూ, నరకప్రాప్తి హేతువూ అయిన
ఈ పాడుబుద్ధి నీ కెందుకు పుట్టింది? నపుంసకుడిలాగ
అధైర్యం పొందకు. ఇది నీకు పనికిరాదు.
మనోదౌర్బల్యం నీచం. దాన్ని విడిచిపెట్టు.
నీవు శత్రుమర్దనుడవు. యుద్ధం ప్రారంభించు.
------------------
సర్వ శాస్త్ర సారం భగవద్గీత
--శ్రీకృష్ణుడు అర్జునునికి ధర్మక్షేత్రమైన కురుక్షేత్రంలో
యుద్ధారంభంలో ఉపదేశిం చిన జ్ఞానబోధయే శ్రీమద్భగవద్గీత.

''గీతలో శ్రీకృష్ణుడు అర్జునునకు ఉపదేశించిన మాటలు జ్ఞానకళికలు. మానవుని జీవితాదర్శనమును తెలియజేసినవి. ఉపనిషత్తులను తోటనుండి ఆధ్యాత్మిక సత్యములను పరిమళ పుష్పములను మాలగా కూర్చినదియే భగవద్గీత' అంటారు శ్రీ వివేకానంద.

''మానవుడు తన ధీశక్తి నంతటినీ ధారపోసినప్పటికీ గీతాజ్ఞానంలో ఏ ఒక్క అంశాన్ని మాత్రమే తెలుసుకోగలడు'' అంటారు శ్రీ అరవిందయోగి.

''ప్రపంచ సాహిత్యంలో గీతకు సాటి వేరొకటి లేదు. అమూల్య రత్నం. పరమానంద పదవికి చేర్చే అపూర్వ సాధనము''
శ్రీ బాలగంగాధరతిలక్‌ అభిప్రాయం.

పై మువ్వురు శ్రీమద్భగవద్గీతను మధించి భాష్యాలు వ్రాసిన మేధావులు.

భారతే సర్వవేదార్థో భారతార్థశ్చి కృత్స్నశ:
గీతాయామస్తి తేనేయం సర్వశాస్త్రమయీ మతా.

సమస్త వేదముల సారము భారతంలో ఉంది.
భారతం యొక్క సారాంశం గీత.

గీత అను రెండు అక్షరాలకు
త్యాగం, తత్త్వజ్ఞానం అని వివరణ ఇచ్చారు ఋషులు.