తిరుమలేశునికి గద్వాల పంచె

తిరుమలేశునికి గద్వాల పంచె

ప్రతి ఏటా అశ్వియుజ మాసంలో జరిగే తిరుమల తిరుపతి బ్రహ్మోత్సవాల మొదటిరోజు జరిగే అంకురార్పణ ఉత్సవానికి గద్వాల ఏరువాడ జోడుపంచెలను వెంకటేశ్వర స్వామివారికి అలంకరించడం ఆనవాయితీగా వస్తోంది. దాదాపు 130 సంవత్సరాల నుంచి శ్రీవారితో ఉన్న ఈ అనుబంధం వల్లే ఇక్కడి చేనేత పరిశ్రమ ఖండాంతర ఖ్యాతిని అర్జించిందని కార్మికుల నమ్మకం. స్వామివారి అలంకరణకు గద్వాల చేనేత కార్మికులు 15రోజులుగా నామాల మగ్గంపై పంచెను నేయడం ప్రారంభించి మంగళవారం పూర్తి చేశారు. ఐదుగురు చేనేత కార్మికులు నిష్టతో జోడుపంచెల నేత పనిని పూర్తిచేసి ప్రత్యేక పూజా కార్యక్రమాలను నిర్వహించారు. 26న తిరుమల తిరుపతి దేవస్థానం ప్రధాన అధికారికి జోడుపంచెలను అందించనున్నట్లు మహంకాళి కరుణాకర్ తెలిపారు..@ బహుజనబంధు.