తెలుగుబంధు( తెలుగుప్రజల ఆత్మబంధు )

పరమశివుడు...
శివుడిని ఎగుడుదిగుడు కన్నులవాడని, ఆదిభిక్షువని, బోళాశంకరుడని...
ఎంతో వెటకారంగా, హాస్యంగా వ్యాఖ్యానించినప్పటికీ దాని వెనుక దాగి ఉన్నది మాత్రం నిరాడంబరత్వం. ‘శ్మశానంలో తిరిగేవాడని, శవాలు కాల్చిన బూడిద ఒంటినిండా రాసుకుంటాడని, కపాలంలో భిక్షాటన చేస్తాడ’ని ప్రతీతి. ఆదిభిక్షువుగా కవుల ప్రశంసలందుకున్నాడు. ఆయన దిగంబరుడు. నిజమే దిగంబరుడు అంటే దిక్కులే అంబరంగా కలవాడని తెలిసిందే. అంటే సర్వవ్యాపి అనే కదా అర్థం. కాబట్టి ఆయన సర్వాంతర్యామి. శివుడు లేని ప్రదేశమే లేదు. అందుకే శివుడాజ్ఞ లేనిదే చీమైనా కుట్టదు అన్నారు. ప్రపంచమంతా ఆయన కనుసన్నలలో నడవవలసిందే. సాక్షాత్తు అన్నపూర్ణాదేవి ఆయన భార్యగా ఉన్నప్పటికీ ఆయన భిక్షకుడే. ఇన్ని నిరాడంబర విధానాలు పాటిస్తాడు శివుడు. ఒక భిక్షకుడు త్రిమూర్తులలో ఒకనిగా, లయకారుడయ్యాడు.