గీతామాహాత్మ్యము

 -:   గీతామాహాత్మ్యము _ 2 :-

   ☀️☀️☀️☀️☀️☀️☀️

 భారతామృతసర్వస్వం విష్ణువక్త్రా ద్వినిసృతమ్ | 

గీతాగంగోదకం పీత్వా పునర్జన్మ న విద్యతే  || 

   "గంగాజలమును పానము చేసినవాడే ముక్తిని పొందుచుండ భగవద్గీతామృతమును పానము చేసినవానిని గూర్చి వేరుగా పలుకునదేమున్నది?  భగవద్గీత యనునది మహాభారతము నందలి దివ్యామృతము మరియు ఆదివిష్ణువైన శ్రీకృష్ణభగవానునిచే స్వయముగా ఉపదేశితమునై యున్నది " (గీతామాహాత్మ్యము  -  5). భగవద్గీత పూర్ణపురుషోత్తముడైన శ్రీకృష్ణుని ముఖతః వెలువడగా, గంగానది ఆతని చరణకమలము నుండి వెలువడినది. దేవదేవుని వక్త్రమునకు, పాదములకు భేదము లేకున్నను పక్షపాతరహితమైన విచారణ ద్వారా భగవద్గీత గంగాజలము కన్నను అధిక ఆవశ్యకమైనదని మనము గుర్తించవచ్చును. 

 సర్వోపనిషదో గావో దోగ్ధా గోపాలనందనః  | 

 పార్థోవత్సః సుధీర్భో క్తా దుగ్దం గీతామృతం మహత్ || 

  "సర్వోపనిషత్తుల సారమైన గీతోపనిషత్తు (భగవద్గీత) గోవు కాగా, గోపాలునిగా ప్రసిద్ధి గాంచిన శ్రీకృష్ణభగవానుడు ఆ గోవు నుండి క్షీరమును పితుకువాడు. అర్జునుడు దూడ కాగా, పండితులు మరియు శుద్ధభక్తులు అమృతమయమైన భగవద్గీతాక్షీరమును పానము చేయువారై యున్నారు."  (గీతామాహత్మ్యము - 6)

 ఏకం శాస్త్రం దేవకీపుత్రగీతం ఏకో దేవో దేవకీపుత్ర ఏవ | 

 ఏకో మంత్రస్తస్య నామానియాని కర్మా ప్యేకం తస్య దేవస్య సేవా ||

  (గీతామాహాత్మ్యము - 7)

 ప్రస్తుత కాలమున జనులు ఒకే శాస్త్రము, ఒకే దేవుడు, ఒకే ధర్మము, ఒకే కర్మము ఉండవలెనని మిగుల వాంఛించుచున్నారు. కనుకనే ఏకం శాస్త్రం దేవకీపుత్ర గీతం - భగవద్గీత ఒక్కటే సమస్త ప్రపంచమునకు సంబంధించిన గ్రంథమగు గాక. ఏకో దేవో దేవకీపుత్ర ఏవ - సమస్త ప్రపంచమునకు శ్రీకృష్ణభగవానుడు ఒక్కడే దేవుడు. ఏకో మంత్రః తస్య నామాని యాని - హరే కృష్ణ హరే కృష్ణ కృష్ణ కృష్ణ హరే హరే / హరే రామ హరే రామ రామ రామ హరే హరే అనెడి ఆ దేవదేవుని నామకీర్తన మొక్కటే ఏకైక మంత్రము మరియు ప్రార్థనము. కర్మా ప్యేకం తస్య దేవస్య సేవా - శ్రీకృష్ణభగవానుని సేవ ఒక్కటియే కర్మము. ⚛️